Personaggi
Tino Nicolini – Poesie Scelte*
Conosce Sestri (Levante)
Se voei conosce Sestri veramente
no stae a da a mente sôlo a-e cartolinn-e
che, "scatte" d'in to centro o da-e collinn-e,
rendan l'idea ûn po lontanamente.
Ma andaevene a miälo de personn-a.
Andaevene pe l'Isôa, a-i Cappûççin,
sciu pe-a Mandrella, in mëzo a brûghi e pin
fra mûggi de profûmmi e d'aia bonn-a.
Giaelo comm'o va giôu: attentamente!
Ammiaelo da Ponente e da Levante,
andae pe-a passeggiata a-a Priacalante
sciû pe Sant'Anna, a moddo, lentamente.
Veddiei che mâ, che vista e che fragransa
nêuva sentiei de tûtte e cöse intorno!
Se l'aei vista n-a votta fae ritorno
oppûre ve-a pensae in ta lontanansa.
A fa coronn-a a-o golfo se pêu vedde
de inçimma all'Isôa dove gh'è i Castelli
i paixi do Tigollio – tûtti belli –
e ûn mondo pe-e dôe maenn-e da no credde.
Leûdi, barche piccinne, gran verzûa,
pescoëi in movimento, rê a sciûgâ.
Se l'è d'estae gabinn-e in riva a-o mâ
o in te l'aegua bagnanti in gran mezûa.
E vedde de chi in çimma poi chi pêu
de nêutte o golfo co-e lampare a çento
e in taera e lûxi a fa coronamento
sente n-a cösa ch'a ghe tocca o chêu.
Canta l'aegua
I
De lazû o moinâ Carlin
o va criando: Fîto, andemmo!
No veddei? Fonzionn-a o moin.
Miae che faenn-a! Anchêu ghe semmo.
A fa l'aegua gran fracasso,
gïa o moin co-o so fron fron.
Tanti arrivan passo passo
chi con gran chi con granon.
Cian cianin se mesia a rêua,
vëgne zû d'aegua ûn cordon
e te pa che sciorte fêua
da-o gran fô questa canson:
– Sciû mesciaêve, sciû paisen,
che l'è l'ôa de semenâ!
Rompî ben, sotto o terren
perchè o posse ben frûttâ.
Sciû, acciappê ben forte a sappa
se voei veddive onorê.
Sciû, che donque o tempo o scappa!
Tûtto o zerbio travaggê.
II
Ven zû l'aegua da-a montagna
zû pe-a valle incamminâ,
a ven fin a-a ciûxa stagna
sorvie a-a casa do moinâ.
Le o a molla zû pe-a rêua.
Ecco a scappa... ecco a s'infia
pe fâ giâ n-a grossa mêua
ch'a l'è tûtta ûn'allegria.
Doppo a scenta zû pe-o rian
pe andâ a-o sciûmme e poi a-o mâ
mentre a reua che gïa cian cian
pa ch'a vêugge ancon cantâ:
– Sciû, mesciaêve, sciû paisen!
Ha insegnôu da sempre a storia
che abbondansa vêu di ben,
sacchi pin vêu di vittoria.
Sciû, da bravi travaggê
con pasiensa e con coraggio.
Recchêuggiëi se semenê.
Tûtto vëgne da-o travaggio.
Pensieri
Quando o riflesso basso do tramonto
s'imbroggia assemme a-a scciûmma da risacca
o mae sgoardo de lì o no se destacca
e a mente a va trottando pe so conto.
Son comme imbambolôu e intanto penso
ammiando o mâ con tûtto o so mistero
e me piggia o magon: va o me pensiero
in ogni direzion, in ogni senso.
Penso a-i faeti do Mondo d'ogni giorno,
penso a ûn mainâ imbarcou o chi in vacansa
parte co-ûn treno e no fan ciû ritorno.
Penso a chi ha famme lazû in lontanansa,
penso a chi, vile, spaccia çerta roba...
Ma penso anche a do ben. Penso a-a Speransa.
A Cappelletta abbandonâ
Montando cian cianin pe n-a crêuzetta
e arrivando sciû in çimma da collinn-a
se trovâva ûn'antiga cappelletta
faeta con de prïe sgrêuzze e da cäsinna.
Forse pe ûn voto o pe animo gentile
co-e so rûsteghe man forti, callose,
ûn contadin sensa da a mente a-o stile
l'ha creâ coscî, tra e piante rigogliose.
Ma gh'ê a-o so posto ormai solo derrûo.
Anche a bella crêuzetta l'è sparia
in t'ûn groviggio dove è sempre scûo,
la sotto a-i bûschi, e a da malinconia.
Dove ûn giorno gh'ëa o verde e tanti fiori
gh'en solo erbasse – Tûtto rinsecchïo –
A primmaveia co-i tanti colori
chi a no l'existe ciû – Tûtto finio.
L'ê triste capî aoa o gran valore
di tempi quando gh'ëa chi ghe portava
a rammetta do verde, o fresco fiore,
che in qualonque stagion o no mancava.
Ean tempi ûn po ciû avari forse quelli,
no gh'ean commoditae comme gh'ê anchêu,
ma a pensâseghe ben ean tempi belli
pe-a vitta sann-a e o meno battichêu.
Ean ätri tempi sci, aoa o progresso
ha portôu ciû ricchessa, l'ê ben vëo,
ma o no ha portôu dell'ätro a-o tempo stesso:
a paxe e o ben pensâ pe-a gente a rëo.
Segnalazion a-n zoenetto
Lascia questo sentê mae cao amigo
perché o te porta in quello bosco scûo
dove gh'è solo, a-a fin, tûtto n'intrigo
de bûschi e poi gh'è sûbito ûn derrûo.
Piggia n-a stradda ch'a no porte a perde:
quella di vëgi, dritta e conosciûa.
Anche lì ghe sän spinn-e in mëzo a-o verde
ma a prosegue in avanti ciû segua.
No l'è o straddin de nomme "Artificiale"
ch'o porta accanto a-o vëo Paradiso
ma a stradda antiga, quella natûrale.
Piggila donque all'atto ben deciso
e vanni avanti allegro con fidûcia:
Ti arriviae a-o scito dove gh'è o sorriso.
A salagion de ancioe
Pescoei che longo l'arco da rivëa
fae discossioin a votte pe de ôe
pe-a lûnn-a che l'è mëgio e pe-a manëa
de mette sotto a-a sâ e vostre ancioe.
Che segge Lûggio, Agosto o n'ätro meize
o metodo l'è sempre quello antigo:
Mettei ciû o meno sâ cian cian a preize
e coscî soggerî a ogni vostro amigo.
Ma se a voiätri piaxe andâ co-o vëgio
a Giggia no l'è ciû de questo avviso.
Secondo le o so metodo l'è mëgio.
Pe conservâle a gh'ha ûn moddo preciso:
Doppo aveile aggaibê in te l'arbanella
invece che da sâ a ghe mette o riso.
Eredi in fermento
Gren liti in famiggia
per via d'interesse:
chignoëi, lalle e nesse,
barûffe a no di.
Colpevole primmo
d'assende sta miccia
l'è o barba Baciccia
perchè l'è crepôu.
Colpevole in tûtto
perchè st'assidente
o s'è – finalmente! –
deciso de môi.
L'è morto a-a sordon-na
co-a pipa fra i denti
lasciando i scontenti
so eredi a stûdiâ.
Per le no importava
lasciando sta tera
fa nasce n-a goaera
fra gente perben!
Da tempo ratellan
perchè co-e palanche
o gh'ha lasciôu anche
de case e terren.
E ogn'ûn ghe pa d'ëse
in to sacro diritto
– lasciôu no ha de scritto –
d'aveine de ciû.
Ûn gran pandemonio
succede in coxinn-a
da lalla Nettinn-a
riguardo a-o spartì.
Chi mette o subbuglio
l'è a Relia do Rocco
dixendo che o tocco
ciû bello a-o vêu le.
A çerte parolle
precisa ghe picca
in te n'êuggiu ûnn-a cicca
spûa da-o Gaitan.
Ûn crïo se sente:
– Son orba! Son morta!
dell'aia... arvî a porta...
me sento svegnî.
So figgia in t'ûn lampo,
piggiando o pestello
che l'è in to lavello,
a se mette a piccâ.
Chi allôa donne e ommi
ognûn se fa avanti:
s'asbrian tûtti quanti
con gran confoxion.
Chi crïa, chi sponcia,
chi tia, chi molla,
Marinn-a a-o Nicolla
a ghe dâ n-a dentâ.
Vestaglie se scuxan,
camixe se strassan,
cavelli che passan
da-e teste in te man.
Ven zû a vascellëa
con tondi, grilletti,
coppette, taretti,
tondann-e, cicchin.
S'imborla ûnn-a testa
in ta porta do lêugo
va a cazze in to fêugo
pignatta e faxêu.
Se versa a ramoaea
co-a zutta de vacca
n-a xatta a se spacca
pe-a testa a-a Nettin
che, in ta zutta cäda
pe grande disdetta
de colpo a s'assetta
co-a testa ammaccâ.
Pe grande disdetta
perchè, in ciû da botta,
ben forte a se scotta
o so grande panê...
Son tûtti sûenti
co-a roba a brandelli
co-e facce e i cavelli
de tutto inciastraê.
Quand'ecco o Nicolla
vegnî comme matto.
Co-ûn grosso penatto
crïâ a ciû no poei.
– Ma basta, finîla!
sennô mi m'arraggio.
Ve strasso! Ve taggio
a tocchetti piccin.
Divento forioso...
v'acciappo pe-a gôa.
Smetteila, l'è l'ôa!
N'ho basta coscî.
Sto vëo finimondo
d'incanto o finisce
ma no se capisce
chi l'è o vinçitô.
O vegio moin
Gh'è a fianco d'ûn torrente ûn moin antigo
che, abbandonôu da anni, o va in rovinn-a
l'è quaexi ascôsa ormai a so casinn-a
da ûn mâ de verde spesso tûtto intrîgo.
Quanti ricordi! I contadin chinâvan
zû pe-i sentê cian cian con passo stanco
portando a spalle o sacco bello gianco
do gran che con vëi stenti coltivavan.
E ritornavan sciû tûtti contenti
co-a faenn-a fresca sciortïa zû da-a mêua
che, pe meito dell'aegua, a grande rêua
metteiva in movimento con gii lenti.
Aôa sto pöveo moin con tanta storia
oltre a rovinn-a e o verde ch'o l'abbranca
l'è anche mutilôu: a rôua ghe manca,
portâ via pe caprissio e non pe-a gloria.
L'han portâ in t'ûn giardin comme ornamento
e li abbrassâ da piante rampiganti
pa ch'a se astimme ammiâ da tûtti i canti
ma le a no pêu gradî sto trattamento.
Ghe manca i vëi amixi de tant'anni:
L'aegua da ciûxa, o pontexello in legno.
La o so dovêi ha faeto in moddo degno,
la le a voeiva restâ co-i so malanni.
E o pöveo moin pa ûn vëgio, che egoiste
personn-e con de scûse che fan lippa,
a compagnia ghe negan da so pippa.
Doppo tanto travaggio! Cösa triste...
Cazze l'aegua da-a ciûxa zû in to fondo
e a scöre ormai pe-o bëo inûtilmente
pe andâ a finî tra i sasci do torrente
dove a s'infia e a pa sparî da-o mondo.
Muagie sgreuzze
Pa n-a scainâ grandiosa sciû a collinn-a
fascie in sce fascie, mûagie faete in pria
sgrêuzze, sensa cemento ne cäseinn-a,
precise, se non proppio in scimmetria.
Crêuse tra e oeive drïte finn-a in çimma
rûsteghe, sci, ma in moddo pittoresco
dove gh'en fïto, daeto o doçe climma,
profûmmi de viovette e de fen fresco!
Gazïe, amandoi, perseghi za in fiore
ancon primma che arrive a Primmaveia
con tûtta a so bellessa e o so calore.
Quando o mâ l'è in bonassa qualche veia
bordezza lenta a-i pe vixin a-i schêuggi
co-o risplendô lasciû do sô da seia.
* la grafia riprodotta è quella utilizzata originariamente dall'Autore.